Në Evropë, një valë e nxehti ekstreme ka përfshirë disa shtete, duke çuar temperaturat mbi 40 gradë Celsius dhe duke shkaktuar pasiguri për shëndetin publik dhe mjedisin.

Në Kataloni të Spanjës, dy persona humbën jetën si pasojë e zjarreve që përfshinë mbi 16 mijë hektarë tokë.

Temperaturat në Sevilla arritën deri në 43 gradë Celsius, ndërsa në El Granadë u regjistrua një rekord prej 46 gradë Celsius për qershorin.

Në lindje të Francës, katër rajone janë nën nivelin më të lartë të paralajmërimit, me temperatura që pritet të arrijnë deri në 39 gradë Celsius.

Në Paris, për të lehtësuar pasojat e të nxehtit, janë zgjatur oraret e punës së parqeve dhe pishinave publike.

Ministria e Shëndetësisë italiane ka shpallur alarm për 18 qytete, përfshirë Romën, Firencen dhe Bologna.

Në Sicili dhe Sardenja, temperaturat mund të arrijnë deri në 49 gradë Celsius, që konsiderohen si më të lartat e regjistruara ndonjëherë në Evropë.

Në pesë rrethe të Turqisë, zjarret e pyjeve kanë detyruar evakuimin e mbi 50 mijë personave.

Një person është hospitalizuar dhe 79 të tjerë janë trajtuar për lëndime të lehta.

Pas shuarjes së një zjarri që shkatërroi 6000 hektarë pyje në ishullin Hios të Greqisë, autoritetet janë në gatishmëri të lartë për të parandaluar shpërthimin e zjarreve të tjera.

Kjo valë e nxehti është pjesë e një tendence më të gjerë që përfshin të gjithë Evropën Jugore dhe Lindore, duke përfshirë edhe Shqipërinë.

Shkencëtarët e klimës theksojnë se këto ngjarje ekstreme janë të lidhura ngushtë me ndryshimet klimatike dhe kërkojnë masa urgjente për reduktimin e emetimeve të gazrave serë.