Një ngjarje tragjike ka ndodhur sot në Prizren, ku një punëtor në një kompani ndërtimi ka humbur jetën si pasojë e rrëzimit nga lartësia në vendin e punës. Sipas njoftimit zyrtar të Inspektoratit Qendror të Punës, punëtori kishte pësuar lëndime të rënda trupore dhe, pavarësisht përpjekjeve mjekësore, ka humbur jetën pas dërgimit në Qendrën Klinike Universitare të Kosovës.

Pas daljes në vendin e ngjarjes, inspektorët kanë konstatuar se kompania ku ndodhi rasti tragjik kishte qenë më parë objekt kontrollesh nga Inspektorati i Punës, si pjesë e aksioneve të ndërmarra në sektorin e ndërtimit në rajonin e Prizrenit.

Gjatë inspektimit të fundit, për shkak të shkeljeve të rënda të dispozitave ligjore për siguri dhe shëndet në punë, ndaj subjektit ishte marrë vendim për ndalimin e përkohshëm të punimeve dhe ishte shqiptuar gjobë.

Megjithatë, kompania – sipas Inspektoratit – nuk e kishte respektuar urdhrin ligjor dhe kishte vazhuar punimet në kundërshtim me vendimin e Inspektoratit.

Komunikata e plotë:

NJOFTIM PËR OPINIONIN PUBLIK

Rreth rastit tragjik të ndodhur në vendin e punës

Inspektorati Qendror i Punës me keqardhje të thellë njofton opinionin publik se sot ka ndodhur një aksident i rëndë në vendin e punës në një subjekt afarist me veprimtari në fushën e ndërtimit në rajonin e Prizrenit, ku si pasojë e rrëzimit nga një lartësi, një punëtor ka pësuar lëndime të rënda trupore, të cilat përkundër përpjekjeve mjekësore, kanë rezultuar fatale pas dërgimit të tij në QKUK.

Inspektorati Qendror i Punës shpreh ngushëllimet më të sinqerta dhe të thella për familjen e punëtorit të ndjerë, duke ndarë dhimbjen me ta për humbjen e jetës së njeriut të tyre të dashur.

Pas daljes në vendin e ngjarjes dhe shqyrtimit të rrethanave, është konstatuar se subjekti në fjalë kishte qenë më herët objekt i inspektimeve nga Inspektorati i Punës, në kuadër të aksioneve të ndërmarra në sektorin e ndërtimit në rajonin e Prizrenit.

Gjatë inspektimit të fundit, për shkak të shkeljeve të rënda të dispozitave për siguri dhe shëndet në punë, ishte marrë vendim për ndalimin e përkohshëm të punimeve dhe ishte shqiptuar gjobë ndaj subjektit.

Megjithatë, pavarësisht këtij vendimi ligjor, subjekti nuk e kishte respektuar ndalimin dhe kishte vazhduar punimet në kundërshtim me urdhrin e inspektoratit, për çka i ishte shqiptuar edhe një gjobë tjetër.

Ky rast tregon edhe njëherë rëndësinë e respektimit të vendimeve të Inspektoratit të Punës dhe të standardeve ligjore për siguri në punë, të cilat kanë për qëllim mbrojtjen e jetës dhe shëndetit të punëtorëve.

Inspektorati Qendror i Punës është duke ndërmarrë të gjitha veprimet ligjore për ndriçimin e plotë të rastit, si dhe do të bashkëpunojë ngushtë me organet kompetente të hetuesisë për përgjegjësitë ligjore të subjektit.

Inspektorati Qendror i Punës

Prishtinë, më 29 tetor 2025