Anëtarët e Grupit të Kontaktit për Mbrojtjen e Ukrainës (UDCG), të kryesuar nga Mbretëria e Bashkuar dhe Gjermania, do të takohen për të diskutuar planet e presidentit të ShBA-së, Donald Trump që aleatët e NATO-s t’i sigurojnë Ukrainës armë.

UDCG, i njohur edhe si formati Ramstein vjen pasi Trumpi ka thënë se dërgesat e armëve, duke përfshirë sistemet e mbrojtjes ajrore Patriot, mund të mbërrijnë në Ukrainë brenda ditësh. Trumpi javën e kaluar ka treguar se ka nënshkruar një marrëveshje me aleatët e NATO-s që do të çonte në dërgesa armësh në shkallë të gjerë në Ukrainë, duke përfshirë sistemet “Patriot”, të konsideruara si një nga më të mirat në botë për zbulimin dhe kapjen e një game të gjerë objektivash ajrore që vijnë. “Ne do të dërgojmë ‘Patriot’ në NATO dhe më pas NATO do t’i shpërndajë ato. Aleanca do të paguajë për sistemet”, ka thënë Trumpi.

Presidenti amerikan, duke folur me shefin e NATO-,  Mark Rutte, ka thënë se armët do të paguhen nga aleatët evropianë dhe se dërgesat fillestare do të mbërrijnë “brenda disa ditësh”. Kuptohet që kombet evropiane do t’i transferojnë armët të mbledhura nga rezervat ekzistuese ose nga ato të reja të blera nga ShBA-ja, në Ukrainë. Zëvendësimet do të blihen nga ShBA-ja.

Nuk është ende e qartë nëse janë bërë transferime armësh në Ukrainë, me komandantin Suprem të Forcave Aleate të NATO-s për Evropën, gjeneralin Alexus Grynkewich, i cili ka thënë se përgatitjet për dorëzimin e armëve ishin “në proces”.

Ambasadori i ShBA-së në NATO, Matthew Whitaker, ka thënë se nuk mund të jepte një afat kohor. Ndërsa kancelari gjerman, Friedrich Merz, ka thënë se ishte i bindur se Gjermania së shpejti do të arrinte një marrëveshje me ShBA-në për dorëzimin e “Patriotëve”.

“Negociatat midis ministrave të mbrojtjes ishin konkrete dhe dorëzimi i tyre ishte çështje ditësh, ndoshta javësh”, ka thënë Merz.

Është raportuar se Forcat e Armatosura të Gjermanisë, Bundeswehr, do të dorëzojnë dy nga nëntë sistemet e saj të mbetura “Patriot” dhe do të marrin zëvendësime nga ShBA-ja. Ky veprim vjen pavarësisht planeve fillestare për të blerë dy sisteme “Patriot” nga ShBA dhe për t’i dërguar ato direkt në Ukrainë.

Sisteme të tjera mund të dorëzohen nëpërmjet Zvicrës, Ministria e Mbrojtjes e së cilës ka njoftuar se ishte informuar nga Departamenti i Mbrojtjes i ShBA-së për të “ripërcaktuar përparësitë e dorëzimit” të pesë sistemeve të porositura më parë për të mbështetur Ukrainën. Një zyrtar i lartë i NATO-s, ka deklaruar se aleanca është duke koordinuar dorëzimin e mbështetjes shtesë ushtarake, duke përfshirë municione dhe predha artilerie, ndërsa Ukraina pret mbërritjen e sistemeve “Patriot”. Presidenti ukrainas, Volodymyr Zelensky, ka njoftuar se zyrtarët e tij kanë propozuar një raund të ri bisedimesh për paqe që do të zhvillohen këtë javë.