Derisa në Dhomat e Specializuara po zhvillohet dita e tretë e deklaratave përmbyllëse në gjyqin kundër krerëve të UÇK-së Hashim Thaçit, Kadri Veselit, Jakup Krasniqit dhe Rexhep Selimit – veterani i UÇK-së, Agim Pllashniku, ka ndërmarrë sot një aksion duke shpërndarë postera nëpër institucionet e vendit në Prishtinë me mbishkrimet: “Drejtësi, jo politikë”, “Gjykata e Hagës kriminale” dhe “Gjykata e Serbisë”.

Ai ka deklaruar se këtë aksion e ka ndërmarrë pas, sipas tij, akuzave të pabaza që Prokuroria e Speciales ka paraqitur ndaj krerëve të UÇK-së.

Pllashniku ka shtuar se, pas këtij procesi, pret që krerët e UÇK-së të dalin fitimtarë edhe në këtë, siç e quajti ai, betejë të padrejtë. “Ata janë çlirimtarët tanë, liria jonë dhe shtetndërtuesit tanë”, ka thënë ai.