Lëvizja Vetëvendosje që garon në balotazh me Partinë Demokratike të Kosovës në Vushtrri, ka nënshkruar koalicion me Lidhjen Demokratike të Kosovës. Kryeministri në detyrë përshëndeti këtë koalicion, derisa kryetari aktual i Komunës thotë se nuk e frikëson një koalicion i tillë.

Njëri doli i dyti e tjetri i treti në zgjedhjet lokale të 12 tetorit.

Kandidati për kryetar komune të Vushtrrisë, Sylejman Meholli nga Lëvizja Vetëvendosje dhe Xhafer Tahiri i Lidhjes Demokratike të Kosovës i bashkuan forcat për garën e balotazhit më 9 nëntor.

Të hënën në praninë e kryeministrit në detyrë, Albin Kurti ata nënshkruan koalicionin mes tyre.

Kurti këtë e cilësoi si një koalicion qeverisës për të mirën e qytetarëve të kësaj komune.

Por këtë veprim Tahiri duket se e mori krye në vete, pasi që LDK e kundërshtoi.

“Veprimet e kandidatit tonë në Vushtrri për të lidhur koalicion me një parti tjetër, janë veprime individuale, të papranueshme dhe në kundërshtim me procedurat statutare të Lidhjes Demokratike të Kosovës. LDK-ja pret që fillimisht të analizohet performanca e kandidatit dhe e Degës së Vushtrrisë, dhe pas këtyre hapave të marrë vendimet përkatëse”, thuhet në njoftimin e LDK-së.

Por a e frikëson një koalicion kryetarin aktual dhe kandidatin e PDK-së për katër vitet e ardhshme?

Sipas tij, ky është më shumë koalicion për interesa personale të Tahirit. Tëvë1