Bombarduesit amerikanë B-2 janë larguar nga Amerika, duke u drejtuar drejt Perëndimit, teksa presidenti amerikan Donald Trump ka deklaruar se do t’i duhen 2 javë kohë të vendosë nëse do të përfshihet në sulmin ndaj Iranit, duke i dhënë një shans zgjidhjes diplomatike.

Sipas të dhënave të gjurmimit të fluturimit, të paktën katër avionë u ngritën nga baza e Forcave Ajrore Whiteman në Missouri të shtunën në mëngjes, të shoqëruar nga katër avionë furnizimi me karburant.

Ata dukeshin se po shkonin në perëndim drejt Bazës Detare Amerikane në Guam në Oqeanin Paqësor. Prej andej, ata mund të shkonin në bazën amerikane në Diego Garcia, në Ishujt Chagos, e cila është në distancë goditjeje nga Irani.

B-2 është i vetmi avion i aftë të transportojë shkatërruesit e bunkerëve të drejtuar me precizion “Massive Ordnance Penetrator” që mund të përdoren për të synuar objektin nëntokësor bërthamor të Iranit në Fordow.

I ndodhur 90 metra brenda një mali, uzina e pasurimit Fordow është një nga tre pjesët kryesore të infrastrukturës bërthamore në Iran, së bashku me uzinën e pasurimit Natanz dhe objektet kërkimore në Isfahan.

Bombarduesi amerikan B-2 mendohet se kushton 2.1 miliardë dollarë, duke e bërë atë avionin ushtarak më të shtrenjtë të ndërtuar ndonjëherë.

Të enjten, Donald Trump tha se vendimi nëse do të sulmohet Irani do të merret “brenda dy javëve të ardhshme”.