Raportuesja për Kosovën në Parlamentin Evropian, Viola von Cramon, u ka bërë thirrje liderëve të Kosovës që të dalin me oferta dhe të kontakojnë me liderët politikë serbë që janë në Prishtinë si dhe të vizitojnë veriun e Kosovës.

Këtë deklaratë ajo e ka bërë nga Mitrovica pas një takimi me dyer të mbyllura që pati me përfaqësues të shoqërisë civile nga komuniteti serb.

Von Cramon ka thënë se liderët e Kosovës flasin serbisht dhe se qasja në Mitrovicë për ta është shumë e lehtë.

Po ashtu, ajo ka thënë se veriu është pjesë integrale e Kosovës dhe qytetarëve të saj.

Gjatë qëndrimit në veri të Kosovës, europarlamentarja ka vizituar një deponi që BE-ja është duke e bërë për katër komunat veriore.