Presidenti serb, Aleksandër Vuçiq, ka reaguar për aksionin “Brezovica” që Policia e Kosovës e ka vazhduar edhe sot, duke arrestuar një doganier dhe kryetarin e bordit të “Ski Center Brezovica”.

Vuçiqi është ankuar se Policia e Kosovës, sipas tij, ka hyrë në disa shtëpi serbe në Shtërpcë e Brezovicë.

Madje, ai e ka nxjerrë nga fantazia e tij qëllimin e këtij aksioni, që sipas tij nuk është lufta kundër krimit dhe korrupsionit, por “krejt diçka tjetër”.

Vuçiqi, siç shkruajnë mediat serbe, ka thënë se qëllimi i institucioneve të Kosovës është ta “pastrojnë” jugun e Kosovës nga serbët, “që ata të mos mbijetojnë”.

Presidenti serb e ka shfrytëzuar mundësinë që sërish të kërkojë vota para zgjedhjeve të 3 prillit në Serbi, duke akuzuar opozitën serbe për “moskujdesjen” për serbët e Kosovës.

“Është mësim për ne që të kujdesemi që të paktën në përmasa të tilla të mos na ndodhin më tragjedi në Kosovë”, ka thënë Vuçiqi.