Presidenti i Serbisë, Aleksandër Vuçiq është duke vazhduar me filmat e tij duke pretenduar se situata e sigurisë në Kosovë është komplekse.

Kabineti i presidentit të Serbisë ka njoftuar të premten se Vuçiqi ka anuluar vizitën në rajonin e Banatit të Jugut në Serbi, për shkak të, siç është thënë “situatës komplekse të sigurisë në Kosovë”.

Në njoftim është thënë se “për shkak të situatës komplekse të sigurisë në Kosovë, presidenti serb, Aleksandër Vuçiq gjatë ditës do të zhvillojë disa takime me faktorë politikë të brendshëm dhe të jashtëm në përpjekje për të stabilizuar situatën”.

“Prandaj ai sot do të marrë pjesë vetëm në mbledhjen e madhe publike në Pançevë, e cila është caktuar për në orën 18:00”, është thënë në njoftimin e shkurtër.

Vuçiqi kishte planifikuar t’i vizitojë  të premten disa qytete në Serbi dhe ditën ta mbyllë në Pançevë, ku është paraparë t’i drejtohet qytetarëve.

E arsyeja e anulimit të këtyre vizitave lidhet me betimin e paralajmëruar të Erden Atiqit në një seancë ceremoniale si kryetar i ri i Mitrovicës së Veriut me fillim nga ora 11.

Vuçiqi dje ka thënë se asnjëherë nuk do t’i njohin kryetarët e rinj shqiptarë të dalë nga zgjedhjet e 23 prillit në katër komunat e veriut të Kosovës.

Edhe shtetet e Quint-it, mbrëmë përmes një deklarate të përbashkët, thanë se ndonëse zgjedhjet ishin legjitime, rezultatet e tyre nuk janë zgjidhje politike afatgjate për këto komuna.