Lidhja Demokratike e Kosovës (LDK) ka mbajtur një tubim elektoral për zgjedhjet e 14 shkurtit.

Në këtë tubim, kandidati për kryeministër nga radhët e LDK-së, Avdullah Hoti, ka thënë se Vushtrria është e vendosur që ta mbështesë këtë parti në zgjedhjet që do të mbahen sot një javë.

“Entuziazmi dhe vullneti për të vazhduar me qeverisjen e LDK-së, u pa sot më së miri nga masa elektrizuese në këtë qytet. Vushtrria është e njohur për bujqësinë, prandaj qeveria jonë ka një plan të qartë për zhvillimin e saj. Ne e kemi aprovuar masterplanin për ujitjen e tokave bujqësore për gjithë Kosovën, përfshirë edhe komunën e Vushtrrisë. I kemi dyfishuar subvencionet në bujqësi dhe kemi vendosur që t’i lirojmë bujqit nga pagesa për ujitje të tokave bujqësore.  Me qeverisjen e LDK-së, qytetarët do të vazhdojnë ta ndjejnë mbështetjen e shtetit, sepse qeverisja jonë, është qeverisje me dinjitet e integritet. Është qeverisje që respekton ligjet dhe kushtetutën. Është qeverisje që ka vizion të qartë properëndimor. Bashkë për fitore!”, ka thënë Hoti.