“The Washington Post” i ka kushtuar vëmendje kërkesës së Kuvendit të Shqipërisë ndaj Këshillit të Evropës që të ndryshojë një rezolutë të vitit 2011 në të cilën thuhet se në Shqipëri është bërë trafik organesh gjate luftës së vitit 1999 në Kosovë.

Inicimi i kërkesës për anulimin e kësaj rezolute që pretendon se gjatë luftës së Kosovës janë marrë dhe trafikuar organe njerëzore nga luftëtarë të UÇK-së  është bërë nga Partia Socialiste (PS).

Gazeta amerikane ka nënvizuar se rezoluta që i kërkon Këshillit të Evropës të pastrojë Shqipërinë dhe Kosovën nga pretendimet e trafikimit të organeve është votuar me 125 vota pro dhe asnjë kundër në Kuvendin e Shqipërisë.

Rezoluta e asaj kohe e Këshillit të Evropës bazohej në një raport të vitit 2010 nga senatori zviceran, Dick Marty. Hetuesi i Këshillit të Evropës kishte thënë se UÇK-ja ishte përgjegjëse për vdekjen e qindra serbëve, romëve dhe shqiptarëve etnikë të dyshuar për bashkëpunim me serbët gjatë viteve 1998-1999 në Kosovë.

Pas një hetimi 2-vjeçar e gjysmë, një prokuror i posaçëm i Bashkimit Evropian në vitin 2014 kishte thënë se kishte “indikacione bindëse” se deri në 10 robër ishin vranë për t’u marrë organet e tyre për trafik të paligjshëm dhe shitje në tregun e zi gjatë luftës.

Megjithatë, prokurori ka kishte thënë se nuk kishte prova të mjaftueshme për të akuzuar dikë për krimet e supozuara. “The Washington Post” ka cituar në shkrimin e saj se kryeministri i Shqipërisë, Edi Rama e ka cilësuar raportin e vitit 2010 nga Marty si monstruoz.