Zbulohet shkaku i aksidentit të teleferikut në Lisbonë
Aksidenti me teleferikun Gloria në Lisbonë, i cili vrau 16 persona, përfshirë turistë nga Mbretëria e Bashkuar, u shkaktua nga një këputje në kabllon që lidh kabinat, sipas raportit të parë zyrtar nga Zyra për Parandalimin dhe Hetimin e Aksidenteve Ajrore dhe Hekurudhore, raportoi Sky News.
Sipas raportit, aksidenti filloi vetëm gjashtë metra pas ngritjes, kur kabina “humbi forcën balancuese të kabllit”.
Punonjësi i frenave në detyrë aktivizoi menjëherë frenat me ajër dhe ato të dorës, por masat nuk arritën ta ulnin shpejtësinë. Makina vazhdoi të përshpejtohej, doli nga shinat me rreth 60 kilometra në orë dhe u përplas me një ndërtesë, të gjitha në më pak se 50 sekonda.
Hetimi deri më tani tregon se pajisjet janë mirëmbajtur rregullisht dhe një inspektim vizual i planifikuar është kryer mëngjesin para aksidentit. Megjithatë, pika ku u këput kablloja nuk ishte e dukshme pa u çmontuar.
Teleferiku Gloria, një monument kombëtar dhe një nga atraksionet më të famshme të Lisbonës, lidh sheshin Restauradores me lagjen Bairro Alto. Aksidenti ndodhi të mërkurën rreth orës 6 pasdite, kur kabina e sipërme rrëshqiti poshtë dhe doli nga shinat vetëm 30 metra nga fundi.
Viktimat përfshijnë shtetasit britanikë Kayleigh Smith (36) dhe William Nelson (44), një person tjetër nga Mbretëria e Bashkuar, si dhe pesë shtetas portugezë, katër prej të cilëve ishin punonjës të organizatave bamirëse.
