Presidenti i Ukrainës, Volodymyr Zelensky i ka bërë thirrje kancelarit gjerman Olaf Scholz që të bëjë një “hap të fuqishëm” dhe të vizitojë Kievin të hënën – në datën kur Rusia feston fitoren e Bashkimit Sovjetik në Luftën e Dytë Botërore.

Ai e ftoi Scholzin në kohën kur marrëdhëniet mes dy vendeve ishin tensionuar, pasi presidenti gjerman ishte refuzuar që të shkojë për vizitë në Kiev muajin e kaluar.

“Ai [Olaf Scholz] është i ftuar, ftesa është e hapur – kështu ka qenë tash e sa kohë. Ai është i ftuar që të vijë në Ukrainë, madje mund ta bëjë një hap shumë të fuqishëm politik nëse vjen në Kiev më 9 maj. Nuk do ta shpjegoj simbolikën, besoj se keni mjaftueshëm njohuri për ta kuptuar përse”, ka thënë Zelensky në një videolidhje.

“Dita e Fitores”, që shënohet më 9 maj, është një nga ngjarjet më të rëndësishme kombëtare të Rusisë, sepse e cilësojnë si përkujtim të sakrificës sovjetike të bërë në mposhtjen e Gjermanisë naziste në atë që në Rusi njihet si Lufta e Madhe Patriotike.

Zelensky nuk e kishte mirëpritur homologun gjerman për vizitë në Ukrainë, për shkak të marrëdhënieve të tij të ngushta me Rusinë në vitet e fundit dhe mbështetjes për tubacionin e gazit “Nord Stream 2”.

Presidenti i Gjermanisë, Frank-Walter Steinmeier, kishte thënë se ai kishte planifikuar të vizitonte Kievin “për të dërguar një sinjal të fortë të solidaritetit evropian me Ukrainën, por që nuk dëshirohej në Kiev”.