Shkruan: Hanife Salihu

Fushata zgjedhore e zgjedhjeve të jashtëzakonshme në Kosovë fillon, më 17.12.2025, dhe do të zgjasë dhjetë ditë. Edhe pse kohëzgjatja është relativisht e shkurtër, pesha politike dhe përgjegjësia që mbart kjo fushatë mbetet e madhe. Ajo paraqet një moment të rëndësishëm reflektimi për nivelin e pjekurisë demokratike të spektrit politik në vend.
Qytetarët janë të lodhur nga fushata të mbushura me akuza, ofendime dhe gjuhë përçarëse. Prandaj, është e domosdoshme që kjo fushatë të mos shndërrohet në arenë sharjesh dhe sulmesh personale, por në një ballafaqim real të ideve dhe programeve. Kushdo që vazhdon me retorikë ofenduese, tregon qartë mungesë vizioni dhe varfëri politike.
Partitë politike kanë përgjegjësi morale dhe politike që të paraqiten para votuesve me programe serioze, të detajuara dhe të realizueshme. Qytetarët kanë nevojë për ide të qarta, plane konkrete dhe vizion afatgjatë, e jo vetëm për slogane apo premtime që përsëriten nga një cikël zgjedhor në tjetrin. Ballafaqimi i sinqertë me realitetin dhe me sfidat e vendit është një hap i domosdoshëm drejt politikës së përgjegjshme.
Kjo fushatë duhet të shërbejë si proces i hapur ballafaqimi të ideve, ku çdo parti të reflektojë mbi veprimet e saj, vendimet e marra dhe ndikimin që ato kanë pasur në jetën e qytetarëve. Pranimi i gabimeve dhe gatishmëria për të mësuar prej tyre është shenjë e pjekurisë politike dhe respektit ndaj votuesve.
Zgjedhjet nuk janë vetëm garë për pushtet, por një moment vendimtar për drejtimin politik, ekonomik dhe shoqëror të vendit. Prandaj, respekti ndaj qytetarëve duhet të reflektohet në gjuhën, sjelljen dhe ofertën politike të secilës parti. Një komunikim i matur, i përgjegjshëm dhe i bazuar në argumente është në interes të të gjithëve.
Në fund, kjo fushatë duhet të shërbejë si test real i seriozitetit politik. Qytetarët do të vlerësojnë jo vetëm premtimet, por edhe mënyrën se si ato prezantohen. Transparenca, llogaridhënia dhe respekti janë elemente kyçe për ndërtimin e besimit dhe për orientimin e së ardhmes së Kosovës.