Zyra Kombëtare e Auditimit (ZKA) ka njoftuar se në sezonin vijues auditues, 2021-2022, do të kryejë auditime të performancës dhe paluajtshmërisë edhe në disa institucione dhe ndërmarrje tjera publike që deri më tani nuk kanë qenë pjesë e auditimeve nga ky institucion.
Listës së auditimeve të ZKA-së tani e tutje do t’i shtohen edhe ndërmarrjet si: “Trepça”, Sh.a, Korporata Energjetike e Kosovës (KEK), Radio Televizioni i Kosovës (RTK) dhe Operatori i Sistemit, Transmisionit dhe Tregut të energjisë elektrike të Kosovës (KOSST), përcjell Buletini Ekonomik.
Në ndërmarrjen Trepça do të auditohet performanca financiare dhe operative e gjithë ndërmarrjes, kurse tek ndërmarrja KOSST do të bëhet auditimi i projekteve kapitale për investimet e bëra nga vet KOSST-i.

Ndërkohë, tek Korporata Energjetike e Kosovës do të bëhet auditimi i të gjitha kontratave publike nga ky institucion.
Gjithashtu, edhe në Radio Televizonin e Kosovës (RTK) do të kryhet auditimi i fondeve publike të televizionit publik me theks në aspektin e burimeve njerëzore përfshirë: stafin e rregullt, angazhimin e bashkëpunëtorëve të jashtëm dhe kontraktimin e programeve vendore.
Si pjesë e këtij sezoni auditues pritet të përfshihet edhe auditimi i projektit kapital “Bashkimi i qytetit” në Komunën e Ferizajt.
Sipas një komunikate për media nga ZKA-ja, qëllimi i këtyre auditimeve është të vlerësojë nëse institucionet dhe ndërmarrjet publike kanë arritur rezultate të mira, dhe se shfrytëzimi i parasë publike nga transmetuesi publik është në pajtim me kornizën ligjore dhe në interes të taksapaguesve kosovarë.
Auditimet janë përzgjedhur bazuar në rëndësinë materiale dhe sociale, treguesit e problemeve dhe vlerësimet e rrezikut, interesit publik, ndikimit në zhvillimin ekonomik, prokurimin publik dhe raportimeve nga mediat.
Auditorja e Përgjithshme, Vlora Spanca, lidhur me këtë ka deklaruar se përmes këtyre auditimeve synohet forcimi i llogaridhënies, transparencës dhe integritetit të Qeverisë dhe të entiteteve tjera të sektorit publik që fondet publike t’i shpenzojnë në mënyrë ekonomike, me efektivitet dhe efikasitet.