Chelsea ka konfirmuar sot (e mërkurë) zyrtarisht nënshkrimin e sulmuesit të gjithanshëm Joao Pedro nga Brighton. Blutë e Londrës kanë bërë një njoftim në të gjitha faqet e tyre zyrtare për kompletimin e transferimit të yllit brazilian 23-vjeçar.

Braziliani ka nënshkruar një kontratë shtatëvjeçare deri në vitin 2032 me “Blutë” dhe thuhet se do të regjistrohet për fazat e fundit të Kupës së Botës për Klube.

“Chelsea është i kënaqur të njoftojë nënshkrimin e lojtarit brazilian Joao Pedro nga Brighton and Hove Albion”.

“Sulmuesi 23-vjeçar ka nënshkruar një kontratë afatgjatë me “Blutë” që vlen deri në vitin 2033 dhe i bashkohet skuadrës menjëherë përpara çerekfinales së Kupës së Botës për Klube kundër Palmeiras”, thuhet në njoftim.

Transferimi i lojtarit thuhet se do t’i kushtojë Chelseat me një tarifë fillestare prej 55 milionë funtesh (63.55 milionë eurosh) plus 5 milionë funte (5.8 milionë euro) bonuse.

Ndryshe, në dy sezonet që luajti për Brighton, Joao Pedro shënoi 19 gola në Ligën Premier.