Kryetari i Kuvendit të Republikës së Kosovës, Kadri Veseli, ka pritur sot në takim ndihmëssekretarin e Mbrojtjes për Çështje të Sigurisë Ndërkombëtare të ShBA-së, Robert Karem, i cili po qëndron në Kosovë në kuadër të kremtimit të 10-vjetorit të pavarësisë së Kosovës.

 Kryeparlamentari Veseli dhe zyrtari i lartë amerikan kanë diskutuar për zhvillimet aktuale në vendin tonë, për mbështetjen e gjithanshme të SHBA-së ndaj Kosovës dhe vazhdimin e bashkëpunimit e të miqësisë midis dy vendeve.

 Veseli ka falënderuar ndihmëssekretarin Karem për përkrahjen që shteti amerikan ka dhënë për Kosovën në kohë dhe rrethana të ndryshme, ndërsa shtroi nevojën për mbështetje të mëtejme dhe ruajtjen e fokusit për Kosovën në agjendat e politikës amerikane.

 Kryeparlamentari Veseli e  ka njoftuar Karemin  për arritjet e Kosovës gjatë dhjetë vjetëve të shtetësisë së saj, si në konsolidimin e brendshëm institucional e demokratik, ashtu edhe në forcimin e subjektivitetit ndërkombëtar, si shtet i cili çdo ditë e më shumë po zë vendin në skenë ndërkombëtare.

 “Kosova dhe SHBA-të do të bashkëpunojnë ngushtë në agjendën e transformimit të FSK-së në Ushtri”, ka thënë Kryeparlamentari Veseli.

Ndërsa diplomati amerikan, Karem, ka konfirmuar se ShBA-ja vazhdon të mbetet mbështetëse e fuqishme e të gjitha proceseve nëpër të cilat po kalon Kosova.