Shqiptarët në Shqipëri dhe Kosovë janë vëllezër që tani jetojnë në dy vende të ndryshme dhe duhet të bashkohen.

Kështu ka thënë kryeministri i Shqipërisë, Edi Rama, në një intervistë për medien serbe “TV Pink”.

Kryeministri Rama ka thënë se është për një rajon pa kufij.

“Nuk e dua kufirin me Kosovën, Malin e Zi, Maqedoninë, Serbinë. Duhet të punojmë për ta bërë atë të ndodhë”, ka thënë Rama.

Më tutje, Rama ka thënë se nevoja për pajtim në mes të Kosovës dhe Serbisë është e pashmangshme. “Dhe sa më shumë Serbia vazhdon të besojë në këtë ëndërr se kjo nuk ka ndodhur ose se ajo mund ta parandalojë atë, do të jetë më e dhimbshme për të gjithë”, ka thënë Rama.

Sipas tij, Serbia duhet të përballet me realitetin dhe të pranojë se Kosova është shtet i pavarur dhe i lirë.

Rama ka theksuar se ai kurrë nuk ka folur për të ashtuquajturën Shqipëri e Madhe dhe se është termi i hartuar për t’u përdorur kundër shqiptarëve.

Ai ka thënë e besonte se serbët dhe shqiptarët mund të bënin për Ballkanin çfarë bëri Franca dhe Gjermania për Evropën.