Kryeministri i Kosovës, Avdullah Hoti, ka dhënë detaje rreth procedurave të shpërndarjes së vaksinës anti-Covid për aplikim në qytetarë.

Hoti është shprehur se Komuniteti i imunizimit ka përgatitur strategjinë i cili dokument pritet të kalojë për miratim edhe në qeveri.

“Është bërë një punë e madhe e Komunitetit të imunizimit, për të përgatitur strategjinë e imunizimit e cila do të kalojë shpejtë në komunitet për tu miratuar, dhe pastaj do të vjen për miratim edhe në qeveri”.

“E mira e këtij dokumenti është që përcaktohen qartë prioritetet e vaksinimit të qytetarëve me vaksinën anti-Covid”, ka thënë Hoti.

Më tutje, ai ka bërë me dije se vaksinimi do të bëhet sipas disa prioriteteve të cilat veçse ka përmendur.

“Dhe ashtu siç na vinë sasitë e vaksinave, ne bëjmë vaksinimin e grupeve të qytetarëve sipas këtyre prioriteteve. Fillimisht mjekët dhe stafi tjetër shëndetësorë, duke qenë se këta janë në ballë të pandemisë”.

“Pastaj personat mbi moshën 65-vjeçare, duke filluar nga personat më të moshuar e duke ardhur më poshtë. Personat që kanë rrezikshmëri të lartë, dhe kjo përcaktohet nga komuniteti i imunizimit”.

“Strategjia parasheh në detaje veprimet konkrete që janë ndërmarrë deri më tani dhe veprimet konkrete për të krijuar kapacitete të nevojshme për këtë vaksinë, për ta shpërndarë në tërë komunat e Kosovës duke integruar Qendrat e Mjekësisë Familjare”.

“Në bazë të kësaj strategjie, QKMF-të, udhëzohen me tutje që të përgatisin listat e qytetarëve sipas këtyre prioriteteve. Pra, mjekët, personat mbi 65 vjeç, personat me rrezikshmëri të lartë”, është shprehur Hoti.