Zëdhënësi i Departamentit të Shtetit, Ned Price, në 22-vjetorin e vrasjes së vëllezërve Bytyqi ka kërkuar nga autoritetet e Serbisë që të hetojnë dhe të sjellin para drejtësisë individët që janë përgjegjës për vrasjen e tyre në vitin 1999 në Serbi.

Price ka shkruar në llogarinë e vet në “Twitter” se ShBA-ja nuk do të ndalet derisa të zgjidhet rasti i vrasjes së vëllezërve Bytyqi.

“Edhe një herë, ne u bëjmë thirrje autoriteteve serbe të hetojnë dhe të sjellin para drejtësisë personat përgjegjës për vrasjet e shtetasve të ShBA-së Agron, Ylli dhe Mehmet Bytyqi në vitin 1999. Shtetet e Bashkuara nuk do të pushojnë së bëri thirrje për një zgjidhje të këtij rasti”, ka shkruar zëdhënësi i Departamentit të Shtetit.

Ndërsa Ambasada e Shteteve të Bashkuara të Amerikës në Beograd kanë thënë se zbardhja e rastit të vrasjes së vëllezërve Bytyqi dhe mbajtja në përgjegjësi e autorëve të vrasjes mbetet prioritet sa u përket raporteve dypalëshe me Serbinë.

Ambasada e ShBA-së në Beograd ka thënë se nuk do ta harrojë asnjëherë një krim të tillë dhe se ka kërkuar nga autoritetet serbe që të vendosin drejtësi për rastin.

Once again, we call upon the Serbian authorities to investigate and bring to justice the individuals responsible for the 1999 killings of U.S. citizens Agron, Ylli, and Mehmet Bytyqi. The United States will not cease in pressing for a resolution of this case. https://t.co/JhKYDuQL9R

— Matthew Miller (@StateDeptSpox) July 8, 2021