Ministri i Punëve të Brendshme, Xhelal Sveçla, ka deklaruar të martën për herë të parë se Policia e Kosovës ka qenë e gatshme edhe fizikisht që t’i heq barrikadat në veri të vendit, të vendosura nga banorët serbë për të kundërshtuar reciprocitetin për targat e automjeteve.

Këto komente Sveçla i ka bërë kur është pyetur nga anëtarët e Komisionit për Siguri dhe Mbrojtje lidhur me problemet logjistike që ka hasur Policia e Kosovës gjatë bllokadës në veri.

“Po e them për herë të parë, ne kemi qenë të përgatitur që edhe fizikisht t’i largojmë barrikadat. Ka qenë çështje e vlerësimit operacional nga policia dhe nga qeveria që të zgjidhet rruga më e mirë e mundshme për largimin e barrikadave. Nuk ka pasur asnjë ngërç në përgatitjen logjistike”, ka thënë ai.

Edhe drejtori i Policisë së Kosovës, Samedin Mehmeti, ka thënë se nuk ka marrë informacione për probleme logjistike nga policët në veri të vendit.

Ai ka mohuar se pjesëtarët e njësisë speciale kanë qenë të bllokuar nga serbët në veri, teksa ka thënë se qarkullimi nuk është ndalur për asnjë moment.