Presidenti i Turqisë,  Rexhep Taip Erdogan, u ka thënë aleatëve se do t’i thotë “jo” ofertës së Suedisë dhe Finlandës në NATO.

Në një bisedë me studentët, mediat e huaja kanë shkruar se Erdogani ka thënë: “Ne do të vazhdojmë politikën tonë në një mënyrë të vendosur. Ne u kemi thënë aleatëve se do t’i themi jo anëtarësimit të Finlandës dhe Suedisë në NATO”.

Miratimi i kërkesës së Finlandës dhe Suedisë nga Turqia për t’u bashkuar me aleancën ushtarake perëndimore është vendimtar sepse NATO-ja i merr vendimet me konsensus. Secili prej 30 vendeve anëtare ka fuqinë për të vënë veton ndaj një oferte anëtarësimi.

Erdogani ka thënë se kundërshtimi i Turqisë rrjedh nga shqetësimet dhe ankesat e saj të sigurisë me mbështetjen e perceptuar të Suedisë – dhe në një shkallë më të vogël të Finlandës – për Partinë e ndaluar të Punëtorëve të Kurdistanit (PKK), dhe një grup të armatosur në Siri që Turqia e sheh si një zgjatje të PKK.

Konflikti me PKK-në ka vrarë dhjetëra mijëra njerëz që nga viti 1984.

Të enjten paradite, sekretari i përgjithshëm i NATO-s, Jens Stoltenberg, ka thënë se ishte “i bindur se do të arrijmë në një vendim të shpejtë për të mirëpritur Suedinë dhe Finlandën për t’u bashkuar me familjen e NATO-s”, pavarësisht kundërshtimit të Turqisë.

Finlanda dhe Suedia aplikuan zyrtarisht të mërkurën për t’u bashkuar me organizatën më të madhe të sigurisë në botë.