Ministria e Financave dhe Ministria e Punëve të Brendshme sot kanë njoftuar se të gjithë zyrtarëve publikë të Republikës së Kosovës do t’u disbursohen pagat e dyta sipas Ligjit për Paga në Sektorin Publik i cili ka hyrë në fuqi me datën 5 shkurt 2023.

Megjithatë këto dy ministri sot nuk kanë njoftuar, ashtu sikurse në muajin e kaluar, se shtesat nuk do t’u dalin këtë muaj dhe se ato do të dalin në mënyrë retroaktive me pagën e muajit prill, për muajin shkurt dhe mars. MPB-ja sot, si duket, ka harruar ta njoftojë sektorin e sigurisë për pagesat e shtesave, të cilat nuk kanë dalë as në këtë muaj.

“Përkundër punës intensive të komisioneve për përcaktim të shtesave, procesi i trajtimit të të dhënave dhe finalizimit të listave është duke vazhduar, andaj njoftojmë të gjithë zyrtarët publikë se shtesat e sipërpërmendura për muajin shkurt dhe mars do të paguhen në mënyrë retroaktive në pagën e muajit prill”, ishte thënë, ndër të tjera, në komunikatën e muaji të kaluar të ministrive përkatëse.

Por, sipas informatave që i ka siguruar “Epoka e re” sot, brenda Policisë së Kosovës ka dëshpërim të madh, pasi që, sipas tyre, uniformat dhe sakrificat e policëve në shërbim të ruajtjes së rendit dhe qetësisë janë duke u nëpërkëmbur nga kjo qeveri. Madje, po sipas burimeve të “Epokës së re” brenda Policisë së Kosovës, pritet të merren masa radikale nëse vazhdohet edhe më tutje kështu.