Një udhëtim veror në bregdetin e Dubrovnikut është shndërruar në një makth të vërtetë financiar për një mërgimtar nga Kosova, i cili plot një vit pas pushimeve ka pranuar një gjobë të jashtëzakonshme në adresën e tij.

Gjatë vizitës në qytetin e njohur kroat, shoferi ishte udhëhequr nga sistemi i navigacionit direkt përmes zonave urbane, pa e kuptuar se pajisja e kishte futur në një zonë me qarkullim të kufizuar historik ku lëvizja e mjeteve të paautorizuara ndalohet rreptësisht. Kamerat e sigurisë të vendosura nga Komuna e Dubrovnikut kanë regjistruar automatikisht targën e automjetit në qershor të vitit të kaluar, ndërsa autoritetet lokale ia kanë deleguar menjëherë lëndën një zyre ligjore private për të gjurmuar pronarin dhe për të ekzekutuar dënimin jashtë vendit.

Sipas dokumentit zyrtar të lëshuar nga zyra e avokatit Shain Pacheco Vinković me seli në Pula, vlera totale që duhet të paguhet për këtë shkelje rrugore arrin në saktësisht 1,505.00 euro. Kjo shifër jashtëzakonisht e lartë lidhet drejtpërdrejt me faktin se automjeti i përdorur është i regjistruar në Gjermani në emër të një biznesi, konkretisht nën emrin e kompanisë “D. G. GmbH”. Ligji kroat parashikon ndëshkime shumë më të ashpra financiare për bizneset dhe firmat që thyejnë rregullat e qarkullimit në zonat e mbrojtura kulturore, ku vetëm gjoba bazë e vendosur nga inspektorët komunalë kap vlerën prej 1,320.00 eurosh, shifër kjo që është rritur më pas nga tarifat e përkthimit, identifikimit të pronarit dhe shpenzimet administrative të zyrës së avokatisë.

Letra zyrtare e dërguar së fundmi paralajmëron se në rast të mospagesës së kësaj shume brenda një afati të shkurtër prej tetë ditësh, ndaj kompanisë në Gjermani do të iniciohet një procedurë zyrtare gjyqësore që mund të çojë në lëshimin e një urdhër-pagese evropiane. Kjo bën që borxhi të vjelet direkt përmes zyrave përmbarimore gjermane, duke u rritur dhe dyfishuar nga kostot e gjykatës. Ky rast i përsëritur shërben si një thirrje e fortë për kujdes për të gjithë turistët dhe mërgimtarët që udhëtojnë drejt destinacioneve të njohura evropiane, ku gabimet e thjeshta të navigacionit digjital po rezultojnë në gjoba të majme që po u vijnë në shtëpi muaj të tërë pas përfundimit të pushimeve. /Urgjent.com/