Donald Trump thotë se ka anuluar sulmet kundër Iranit me kusht që një marrëveshje të arrihej “shpejt” me vendin.

Në një postim në Truth Social, presidenti amerikan shkroi se kishte vendosur të “anulonte sulmin, me kusht që të ishte në gjendje të arrinte shpejt një MARRËVESHJE” – e cila do të përfshinte hapjen e menjëhershme të Ngushticës së Hormuzit dhe fundin e “kërcënimit bërthamor të Iranit”.

Trump tha se vendimi ishte marrë së bashku me Izraelin. Njoftimi erdhi mes raporteve të medias amerikane se Uashingtoni mund të ketë planifikuar sulme të reja dhe intensive ndaj Iranit gjatë fundjavës.

Teherani më parë akuzoi SHBA-në për përshkallëzim të tensioneve, duke thënë se çdo shtet rajonal që bashkëpunon me Uashingtonin do të “përfshihej nga flakët e luftës”.

Në postim, Trump tha se SHBA-të ishin “të përgatitura dhe të gatshme për të luftuar kundër Republikës Islamike të Iranit, në nivele të Terrorit, Forcës dhe Pushtetit Ushtarak të papara që nga Lufta e Dytë Botërore”.

Por ai tha se i kishte anuluar sulmet pasi iu “kërkua” nga Irani dhe vendet e tjera në Lindjen e Mesme të “priste” çdo sulm për të lejuar arritjen e një marrëveshjeje.

Ai dukej sikur sugjeronte se ishte bërë përparim drejt një marrëveshjeje, duke thënë se “janë rënë dakord për perimetrin e një marrëveshjeje”.

“Kjo do të përfshinte HAPJEN E MENJËHERSHME, TË PLOTE DHE PLOTË TË NGUSHTICËS SË HORMUZIT dhe fundin e kërcënimit bërthamor të Iranit”, shkroi ai.

Irani ende nuk i është përgjigjur njoftimit të Trump./BBC