Bashkimi Evropian (BE) do të përdorë 1.4 miliardë euro nga interesat e krijuara mbi asetet e ngrira ruse për të mbështetur Ukrainën, ka bërë të ditur Komisioni Evropian. Fondet burojnë nga interesat mbi bilancet monetare që lidhen me asetet e Bankës Qendrore të Rusisë, të cilat u ngrinë nga BE-ja pas nisjes së pushtimit rus në Ukrainë.

Presidentja e Komisionit Evropian, Ursula von der Leyen, ka deklaruar se këto të ardhura do të përdoren për të ndihmuar Ukrainën në përballimin e pasojave të luftës.

“Rusia duhet të paguajë për shkatërrimin që ka shkaktuar. Ne po përdorim të ardhurat nga asetet e ngrira ruse për të siguruar që kjo të ndodhë”, ka thënë von der Leyen.

Sipas saj, fondet shtesë prej 1.4 miliardë eurosh do të kontribuojnë në forcimin e rezistencës së Ukrainës ndaj agresionit rus dhe në mbështetjen e përpjekjeve të saj gjatë luftës. Vendimi është pjesë e përpjekjeve të BE-së për të shfrytëzuar burimet financiare që lidhen me asetet ruse të ngrira, me synim mbështetjen e Ukrainës dhe kërkimin e përgjegjësisë financiare nga Moska për dëmet e shkaktuara nga konflikti.