Ministri në detyrë i Infrastrukturës dhe Transportit, Dimal Basha, ka inspektuar nga afër punimet që po zhvillohen në segmentet e skarpateve përgjatë autoudhës “Ibrahim Rugova”.

Gjatë vizitës në terren, Basha, së bashku me ekipet përgjegjëse dhe operatorët e angazhuar në punime, ka diskutuar për sfidat e hasura dhe masat që duhet të ndërmerren për trajtimin e plotë dhe afatgjatë të këtyre segmenteve.

Sipas Ministrisë së Infrastrukturës dhe Transportit, qëllimi i ndërhyrjeve është që rehabilitimi i skarpateve të jetë i qëndrueshëm dhe permanent, duke parandaluar përsëritjen e problemeve në të ardhmen dhe duke rritur sigurinë për të gjithë përdoruesit e autoudhës.

Ministria ka bërë të ditur se ecuria e punimeve po monitorohet në baza ditore, ndërsa në bashkëpunim me të gjithë akterët përgjegjës po punohet që ndërhyrjet të realizohen me cilësi, efikasitet dhe zgjidhje të qëndrueshme.