Uashingtoni po përgatitet ta shtrijë më tej fushatën kundër trafikut të drogës në Amerikën Latine, duke parashikuar edhe ndërhyrje në terren në bashkëpunim me aleatët rajonalë.

Planet u njoftuan nga sekretari amerikan i Mbrojtjes, Pete Hegseth, gjatë një vizite në Panama. Ai deklaroi se ShBA-ja synon të ndërtojë së shpejti, së bashku me shtetet partnere, kapacitete operacionale të ngjashme me ato të angazhuara në goditjet ndaj motoskafeve që, sipas pretendimeve amerikane, përdoren për transportimin e drogës në Karaibe dhe në Oqeanin Paqësor.

Në këtë kuadër, Shtetet e Bashkuara po bashkëpunojnë me vende si Ekuadori dhe Kolumbia për t’u përballur në terren me grupet që Uashingtoni i ka shpallur organizata terroriste, bëri të ditur Hegseth.

“Kudo që trafikoni drogë ose kërcënoni popullin amerikan apo partnerët tanë, do të jeni në shënjestër”, paralajmëroi kreu i Pentagonit, në një mesazh drejtuar karteleve të drogës.

Nisma “Mburoja e Amerikave”, e udhëhequr nga administrata e Donald Trump, deklaron si qëllim luftën kundër trafikut të lëndëve narkotike. Aleanca përmbledh rreth 20 shtete nga Amerika Latine dhe Karaibet.

Pjesë e saj janë gjithashtu Argjentina, Bolivia, Kili, Hondurasi dhe Peruja, ndërsa Meksika, nën drejtimin e presidentes Claudia Sheinbaum, nuk i është bashkuar nismës.

Të dhënat e përmendura në raportime tregojnë se gjatë këtyre operacioneve janë vrarë të paktën 215 persona.

Megjithatë, administrata Trump nuk ka publikuar dëshmi që provojnë se të gjitha anijet e goditura transportonin drogë ose përfshiheshin në veprimtari të paligjshme.

Kjo fushatë ka nxitur reagime dhe kritika nga specialistë të së drejtës ndërkombëtare. Ata kanë ngritur pikëpyetje mbi ligjshmërinë e përdorimit të forcës ushtarake ndaj personave që, sipas vlerësimit të tyre, nuk paraqesin rrezik të drejtpërdrejtë për Shtetet e Bashkuara.