Analisti Petrit Zogaj, ka vlerësuar se LDK-ja i ka ofruar Lëvizjes Vetëvendosje arsyetimin që i nevojitej për të shkuar në zgjedhje të reja në vjeshtë.

Zogaj ka thënë se fillimisht LV-ja krijoi përshtypjen se po kërkonte një partner për bashkëqeverisje, ndërsa LDK-ja, sipas tij, u vetëofrua menjëherë me kërkesën për postin e presidentit.

Sipas tij, Vetëvendosjes iu deshën disa javë që këtë kërkesë ta paraqiste si absurde dhe ta shtynte LDK-në drejt dorëzimit.

“Në të njëjtën kohë, LV-ja e krijoi përshtypjen se konstituimi i Kuvendit nuk është problem dhe, për ta bërë këtë, duhet marrëveshja për presidentin”, ka thënë Zogaj.

Ai ka thënë se, pas tërheqjes së LDK-së nga kërkesat për pushtet, LVV-ja e ka “betonizuar” idenë se zgjedhja e presidentit është problemi kryesor dhe se duhet të ketë pajtim për këtë para se të procedohet me Kuvendin dhe Qeverinë.

“Frika e LDK-së për të shkuar në zgjedhje është aq e lexueshme, saqë do të ishte budallallëk për LVV-në që të mos insistonte që të mbështetet emri i saj për president. Pra, ose presidenti i LVV-së, ose zgjedhje”, ka thënë ai.

Në fund, Zogaj e ka kritikuar pozicionin aktual të LDK-së, duke thënë se kjo parti nuk është as opozitë e mirëfilltë, as pjesë e qeverisë dhe as alternativë për zgjedhjet e ardhshme.

“LDK-ja as opozitë e mirëfilltë, as pjesë e qeverisë dhe as alternativë në zgjedhjet e ardhshme”, ka përfunduar ai.