Më 26 gusht, Gjykata e Apelit në Shkup ka lënë në fuqi vendimin për lirimin nga akuzat të ish-kryeministrit të arratisur Nikola Gruevski në çështjen e korrupsionit “Talir 2”, raportojnë mediat në Maqedoninë e Veriut.

Me këtë vendim përfundimtar dhe ligjërisht të detyrueshëm, gjykata ka rrëzuar ankesën e prokurorisë dhe ka përmbyllur një proces gjyqësor shtatëvjeçar që lidhej me financimin dhe ndërtimin e paligjshëm të selisë multimilionëshe të VMRO-DPMNE-së, të njohur si “Pallati i Bardhë”.

Trupi gjykues i Apelit ka vlerësuar se vendimi i gjykatës së shkallës së parë duhet të mbetet në fuqi. Sipas tij, prokuroria nuk ka arritur të dëshmojë përtej çdo dyshimi të arsyeshëm se Gruevski ka tejkaluar kompetencat zyrtare apo ka shkelur rregullat për financimin e partive politike.

Çështja është ndikuar edhe nga ndryshimet e debatueshme në Kodin Penal, të miratuara nga parlamenti në Shkup gjatë vitit 2023. Ndërhyrjet ligjore e kanë dobësuar ndjeshëm bazën për ndjekjen penale të shpërdorimit të detyrës dhe kanë reduktuar afatin e parashkrimit. Pa një vendim lirimi nga gjykata, procedura do të parashkruhej plotësisht brenda disa ditësh.

Sipas portalit Sloboden Peçat, konfirmimi i pafajësisë ka mbyllur përfundimisht edhe përpjekjen e shtetit për të konfiskuar selinë e VMRO-DPMNE-së, si dhe rreth 30 prona të tjera të ngrira që lidhen me partinë.

Edhe pse vendimi për “Talir 2” përbën një fitore përfundimtare për Gruevskin në këtë çështje, gjendja e tij juridike vazhdon të jetë e ndërlikuar. Në gjykimin e parë, në vitin 2022, ai ishte dënuar me gjashtë vjet burg për këtë rast, por Gjykata e Apelit e kishte anuluar vendimin dhe kishte urdhëruar zhvillimin e një rigjykimi.

Gruevski vijon të qëndrojë i arratisur në Hungari, ku në vitin 2018 kishte marrë azil politik për t’i shpëtuar një dënimi tjetër të formës së prerë me dy vjet burg në çështjen “Tanku”, e cila lidhej me një Mercedes luksoz antiplumb.

Për të ekzistojnë gjithashtu dënime të tjera përfundimtare, mes tyre edhe një dënim nëntëvjeçar, të konfirmuar nga Gjykata e Apelit në vitin 2023, për çështjen e pastrimit të parave “Parcelat në Vodno”.

Autoritetet hungareze vazhdojnë të mos pranojnë kërkesat për ekstradimin e tij nga Maqedonia e Veriut, ndërsa statusi i Gruevskit si refugjat në Budapest mbetet ende aktiv.