Rreth 15 mijë e 800 persona kanë vdekur në Gjermani si pasojë e temperaturave të larta që nga fillimi i vitit 2026, sipas të dhënave të Institutit Robert Koch (RKI), instituti gjerman për shëndetin publik.

Shifra, e cila bazohet në të dhënat deri më 26 korrik, tregon se Gjermania ka regjistruar tashmë më shumë viktima të lidhura me temperaturat e larta në më pak se shtatë muaj sesa në çdo vit të plotë që nga viti 2016, raporton Deutsche Welle.

Numri më i lartë i viktimave në një vit të plotë para vitit 2026 ishte rreth 9 mijë persona në vitin 2018, i cili po ashtu ishte karakterizuar nga temperatura jashtëzakonisht të larta.

Sipas RKI-së, më shumë se gjysma e viktimave të vlerësuara këtë vit, rreth 9 mijë e 600 persona, lidhen me valën rekord të të nxehtit që goditi vendin në fund të qershorit.

Gjatë kësaj vale, temperaturat në disa zona të Gjermanisë arritën në gati 42 gradë celsius.

Qershori i vitit 2026 ishte gjithashtu muaji më i nxehtë i regjistruar ndonjëherë në Evropën Perëndimore, sipas të dhënave të shërbimit klimatik të Bashkimit Evropian, Copernicus.

Ndërkohë, rreth 4 mijë vdekje të tjera i janë atribuar motit të nxehtë nga fundi i korrikut deri në mesin e gushtit.

Numri përfundimtar i viktimave pritet të jetë edhe më i lartë, pasi disa lande gjermane i raportojnë të dhënat e vdekshmërisë me vonesë prej disa javësh.