Një rrëshqitje masive dheu ka goditur Gyirong Port, një nga pikat kryesore kufitare mes Kinës dhe Nepalit, duke shkaktuar një situatë tejet të rrezikshme dhe ndërprerje të qarkullimit.

Pamjet dramatike të publikuara nga vendi i ngjarjes tregojnë një masë të madhe balte, gurësh dhe mbeturinash që zbret me shpejtësi drejt pikës kufitare.

Në video shihen shumë njerëz duke u përpjekur të largohen me shpejtësi nga zona, ndërsa masa e dheut dhe baltës afrohet. Njerëzit duken të alarmuar dhe përpiqen të gjejnë rrugë për t’u shpëtuar, por në pamje shihet se arratisja bëhet pothuajse e pamundur për shkak të shpejtësisë dhe përmasave të rrëshqitjes.

Në zonë shihen edhe automjete dhe autobusë, ndërsa brenda pak sekondash situata përshkallëzohet, duke e kthyer pikën kufitare në një zonë të rrezikshme.

Ngjarja ka ndodhur në një kohë kur rajoni po përballet me reshje të dendura dhe përmbytje, të cilat kanë rritur ndjeshëm rrezikun për rrëshqitje të dheut.

Autoritetet kanë ndërmarrë masa për kufizimin e qarkullimit në zonën e prekur, ndërsa ekipet e emergjencave po vlerësojnë dëmet dhe situatën në terren.

Gyirong Port ndodhet në rajonin autonom të Tibetit, në kufi me Nepalin, dhe është një nga korridoret e rëndësishme të transportit ndërmjet dy vendeve.

Pamjet e publikuara në rrjetet sociale tregojnë momentin dramatik, ku një numër i madh njerëzish përpiqen të largohen nga zona pak para se ajo të përfshihet nga masa e dheut dhe baltës.