Lëvizja Vetëvendosje, Qendra në Prishtinë, ka zhvilluar të martën një aksion simbolik para objektit të Komunës së Prishtinës, në shenjë proteste për gjendjen me mbeturinat në kryeqytet.

Gjatë aksionit, hyrja e objektit të komunës është bllokuar me thasë me mbeturina. Megjithatë, aksioni ka zgjatur vetëm pak minuta, pasi ndërmarrja “Pastrimi” ka reaguar dhe i ka larguar thasët nga hyrja e komunës.

Asamblisti i LV-së në Komunën e Prishtinës, Egzon Azemi, ka deklaruar se përmes këtij aksioni është synuar të tërhiqet vëmendja për, siç e ka quajtur ai, gjendjen alarmante me mbeturinat në kryeqytet.

“Ky aksion simbolik shpërfaq një problematikë jashtëzakonisht shqetësuese në Komunën e Prishtinës. Problemi i mbeturinave nuk ka qenë kurrë në historinë e kryeqytetit në këtë nivel kaq alarmant. Shumica e lagjeve të Prishtinës janë shndërruar pothuajse në deponi mbeturinash”, ka deklaruar Azemi.

Ai ka kritikuar kryetarin e Prishtinës, Përparim Ramën, duke e akuzuar se nuk po merret mjaftueshëm me problemet e qytetit.

“Zotëri Rama, në vend se të ishte kryetar i Komunës së kryeqytetit, është shndërruar në një vegël të Partisë Demokratike”, ka deklaruar Azemi.

Ai ka shtuar se Komuna e Prishtinës për vite me radhë nuk ka blerë mjete të reja për pastrimin e mbeturinave, ndërsa ka kritikuar edhe mënyrën e funksionimit të ndërmarrjes “Pastrimi”.

“Prishtina nuk ka qenë kurrë më e ndotur dhe Komuna e Prishtinës për vite të tëra nuk ka blerë as edhe një kamionetë të vetme për pastrimin e mbeturinave. Në ndërmarrjen ‘Pastrimi’ janë të punësuar rreth 900 punëtorë, por vetëm 100 e diçka prej tyre merren me pastrimin e qytetit”, ka deklaruar ai.

Azemi ka kritikuar edhe mënyrën e funksionimit të ndërmarrjes “Pastrimi”, duke thënë se problemet me mbeturinat dhe çështjet e tjera në kryeqytet duhet të jenë në fokus të kryetarit.

“Pra kjo flet se si i kanë shkatërruar ndërmarrjet duke punësuar zyrtarë administrativë edhe në Ndërmarrjen ‘Pastrimi’, e cila do të duhej t’i shërbente për mirëmbajtjen e qytetit.

Këto skandale të njëpasnjëshme, skandalet e pronave, skandalet në Ndërmarrjen Publike Banesore, kjo gjendje alarmante me mbeturina, normalisht se duhet të ishin temat me të cilat merret kryetari i kryeqytetit, por si duket atij më shumë po i intereson të merret me temat e nivelit qendror. Nuk ka të keqe të merret me temat e nivelit qendror, por ai duhet ta dijë se është kryetar i kryeqytetit dhe duhet të merret kështu me problemet e qytetarëve të Prishtinës”, ka deklaruar Azemi.

Pas këtij aksioni të zhvilluar para objektit të komunës, aty është parë edhe Inspektorati.