400 anëtarë të SBAShK-ut do të pushojnë në bregdetin shqiptar

25 qershor 11:09

Këtë verë 400 anëtarë të Sindikatë së Bashkuar të Arsimit, Shkencës dhe Kulturës (SBAShK) pushojnë në bregdetin shqiptar.

Grupi i parë do të nis pushimet më 26 qershor, për të vazhduar grupet tjera sipas agjendës së përcaktuar nga Komisioni për përgatitjen e pushimeve.

“Duke vlerësuar e çmuar lart përkushtimin e punëtorëve të arsimit të Kosovës në edukimin e arsimimin e brezave, SBAShK-u vazhdon me traditën e mirë të njohjes së këtij kontributi duke dërguar çdo verë një numër të konsiderueshëm të anëtarëve të vet për pushime në bregdetin shqiptar. Në verën 2019 Këshilli Drejtues i SBASHK-ut, pasi ka analizuar në përpikëri mundësitë buxhetore, ka vendosur që në çdo 60 anëtarë të dërgojë një pushues në bregdetin shqiptar. Përzgjedhjen e pushuesve e kanë bërë shoqatat sindikale në çerdhe, shkolla fillore e të mesme, në njësitë akademike të universiteteve dhe të institucioneve të kulturës”, është thënë në njoftimin e SBAShK-ut.

Sipas këtij njoftimi, të 400 pushuesit janë të ndarë në katër grupe me qëllim që organizimi të jetë sa më i mirë i pushimeve dhe aktiviteteve sindikale atje.

“Grupi i parë me pushuesit nga Podujeva, Prishtina, Skenderaj, UP-ja, Qendra e studentëve, Fushë Kosova, Obiliqi dhe institucionet e kulturës e nisin këtë traditë të mirë të mërkurën, më 26 qershor, për të vazhduar ky aktivitet me pushuesit nga komunat tjera sipas agjendës së përcaktuar nga Komisioni për përgatitjen e pushimeve. Pushuesit gjatë qëndrimit në bregdetin shqiptar, përveç pushimit të merituar, do të zhvillojnë edhe aktivitete sindikale përmes tryezave dhe debateve për arritjet, sfidat dhe idetë e reja për angazhimin sindikal në vijim. Kryesia e SBAShK-ut dhe Komisioni për pushime për hir të transparencës së plotë me të përfunduar të këtij aktiviteti do të botojë në uebfaqen e saj (sbashk-rks.org) listën e plotë me të gjithë emrat e pushuesve, që janë caktuar nga shkollat dhe njësitë akademike”, është bërë me dije në njoftimin e SBAShK-ut.

/Epoka e re/

Lajme të sponsorizuara

Të fundit
Sot prej orës 15:00, mbahet ceremonia e nënshkrimit të kredisë…