Aston Villa ka shkruar faqen më të lavdishme të historisë së saj moderne evropiane, duke fituar për herë të parë trofeun e Ligës së Evropës.

Në finalen e madhe të zhvilluar në stadiumin “Beşiktaş Park” të Stambollit, skuadra angleze mposhti me një rezultat bindës 3-0 gjermanët e Freiburgut. Ky sukses rikthen klubin nga Birmingami te triumfet e mëdha kontinentale për herë të parë që nga viti i largët 1982, shkruan T”op Channel”.

Ndeshja u dominua totalisht nga djemtë e Unai Emeryt, të cilët e zgjidhën sfidën me një dritëshkrim taktik perfekt. Rrugën drejt trofeut e hapi Youri Tielemans në minutën e 41-të, ndërsa Emiliano Buendía dyfishoi shifrat në sekondat e fundit të pjesës së parë. Goditjen e nokautit Freiburgut ia dha Morgan Rogers në minutën e 58-të, duke nisur festën legjitime të tifozëve anglezë në Turqi. Ky triumf jo vetëm që pasuron bllokun e trofeve të Villas, por ndez zyrtarisht ethet e llogarive në Premierligë për një skenar të jashtëzakonshëm: dërgimin e gjashtë skuadrave në edicionin e ardhshëm të Ligës së Kampionëve.

Kombinimi i artë i rregullores dhe koeficientit të UEFA-s

Se si mund të përfaqësohet Anglia me gjashtë skuadre në elitën e futbollit europian, ky është një mekanizëm sa kompleks, aq edhe magjepsës që lidhet drejtpërdrejt me performancën e këtij sezoni. Rruga tradicionale garanton katër bileta për katër vendet e para të Premierligës. Mirëpo, falë reformës së re të UEFA-s, dy kampionatet me performancën më të mirë në Europë përfitojnë nga një vend shtesë, i njohur si “Vendi i Performancës Europiane”. Anglia e ka siguruar matematikisht vendin e parë në këtë renditje koeficientësh, duke grumbulluar një mesatare mbresëlënëse prej 28.125 pikësh nga nëntë klubet e saj pjesëmarrëse.

Zinxhiri logjik që mundëson mrekullinë e gjashtë klubeve lidhet ngushtë me pozicionin përfundimtar të Aston Villas në kampionat. Nëse skuadra e Emeryt e mbyll sezonin në vendin e pestë, ajo kualifikohet automatikisht në Ligën e Kampionëve si fituese e Ligës së Evropës. Katër vendet e para të tabelës shkojnë si zakonisht në turneun madhor, ndërsa biletën shtesë të koeficientit të UEFA-s e trashëgon automatikisht skuadra që renditet në vendin e gjashtë. Një skenar i tillë nuk është i panjohur për futbollin ishullor, pasi u përsërit edhe në edicionin e kaluar, kur suksesi i Tottenhamit në Ligën e Evropës dërgoi gjashtë klube angleze në elitë.

Drama e xhiros së fundit në Premierligë

Kur ka mbetur vetëm edhe një javë nga ulja e siparit të kampionatit, vëmendja zhvendoset te kombinimet e fundit të tabelës. Aktualisht, Arsenal dhe Manchester City kanë siguruar pozicionet e para, të ndjekur nga Manchester United në vendin e tretë. Aston Villa mban për momentin vendin e katërt me 62 pikë, tri më shumë se Liverpooli i vendit të pestë. Megjithatë, asgjë nuk ka përfunduar. Në ndeshjen finale, Villa ka një transfertë tmerrësisht të vështirë përballë Manchester City-t, ndërsa Liverpooli pret në shtëpi Brentfordin me një diferencë golash dukshëm më të mirë.

Nëse Aston Villa mposhtet nga City dhe Liverpooli fiton, skuadra nga Birmingami zbret në vendin e pestë. Ky dështim në kampionat do të ishte paradoksalisht një dhuratë e artë për pjesën tjetër të ligës, sepse bën që vendi i gjashtë të shndërrohet në një biletë për në Ligën e Kampionëve. Për këtë pozicion të fundit fatlum, Bournemouthi dhe Brightoni janë dy skuadrat me shanset më reale matematike për të përfituar nga ky kombinim i çmendur i rezultateve, duke mbyllur kështu një nga netët më dramatike dhe më të rëndësishme të historisë së futbollit anglez në arenën ndërkombëtare.