Klubi italian do të luajë në Serinë A, kurse sulmuesi Emmanuele Calaio është dënuar me dy vjet moslojë.

Parma mund të marrë frymë lirshëm. Skuadra italiane në sezonin 2018-2019 mbetet pjesë e Serisë A, të drejtë që e ka fituar në fushën e lojës, por ajo do ta nisë sezonin e ri me një dënim prej -5 pikësh në renditje.

Gjykata italiane ka dhënë vendimin e saj në lidhje me klubin e sapo kthyer në Serinë A, duke i hequr pesë pikë nga klasifikimi, ndërsa ka dënuar me dy vjet moslojë sulmuesin Emanuele Calaio.

Sulmuesi i Parmës ishte pikërisht ai që u kishte çuar disa mesazhe të dyshimta disa lojtarëve të Spezias në “WhatsApp” duke u kërkuar të mos luanin fort në ndeshjen e fundit të sezonit në Serinë B ndaj tyre. Parma rrezikonte rikthimin në Serinë B pikërisht për shkak të këtyre mesazheve, por ka shpëtuar vetëm me heqje të pikëve.