Policia e Kosovës është duke hetuar një rast zhdukjeje të raportuar nga një qytetar, i cili ka njoftuar se ka humbur kontaktet me motrën e tij menjëherë pasi ajo mbërriti në Prishtinë.

Sipas denoncimit, gruaja kishte udhëtuar me autobus nga jashtë vendit dhe pas zbritjes në stacionin e autobusëve nuk është parë më dhe nuk është përgjigjur në asnjë formë komunikimi.

Sipas familjarëve, prej momentit të mbërritjes së saj nuk kanë asnjë informacion për vendndodhjen e gruas. Policia ka nisur procedurat hetimore për të sqaruar rrethanat dhe për të gjetur personin e zhdukur.

“Person i zhdukur- Stacioni i Autobusëve, Prishtinë/ 27.11.2025. Me 29.11.2025 ankuesi m/k, ka raportuar se motra e tij viktima f/k, ka ardhur me autobus nga një shtet tjetër dhe ka zbritur në Prishtinë. Nga ai moment i kanë humbur lidhjet me viktimën dhe nuk kanë njohuri për vend ndodhjen e saj. Rasti në procedurë hetimore”, ka njoftuar policia.