Nënkryetari i LDK-së dhe kryetari i Pejës, Gazmend Muhaxheri, ka thënë se kjo parti nuk ka vendosur ende se cili do të jetë qëndrimi i saj kur të vijë koha për zgjedhjen e presidentit të ri.

Muhaxheri ka lënë të kuptohet se Kryesia do ta përkrahë qëndrimin e kryetarit të LDK-së, Lumir Abdixhiku, i cili ka thënë se emrat e përveçëm për postin e presidentit nuk duhet t’u imponohen deputetëve dhe se, për votimin e udhëheqësit të shtetit, konsensusi është i domosdoshëm.

“Pas mbledhjeve që do t’i mbajë LDK-ja dhe koordinimeve që do t’i kemi, do të vendoset se çfarë qëndrimi do të mbajmë për çështjen e presidentit. Zyrtarisht nuk ka asgjë. Me siguri kryesia e LDK-së e përkrah qëndrimin e Abdixhikut”, ka thënë ai për “RTV21”.

Muhaxheri ka thënë se është përgjegjësi e partisë fituese,  LV-së që t’i formojë institucionet e reja.

“Nuk varet nga ne kjo. Kryetari i partisë fituese i ka votat për ta formuar Kuvendin dhe institucionet e tjera”, ka thënë Muhaxheri.