Prishtina do të jetë nikoqire e Lojërave Mesdhetare në vitin 2030, një ngjarje e madhe multisportive që dallon nga të gjitha garat e tjera ndërkombëtare për shkak të karakterit të saj të veçantë rajonal, kulturor dhe sportiv. Për Kosovën, ky organizim përfaqëson një moment historik, jo vetëm në aspektin sportiv, por edhe në afirmimin ndërkombëtar të vendit.

Lojërat Mesdhetare janë të veçanta sepse bashkojnë vetëm shtetet që lidhen gjeografikisht dhe historikisht me rajonin e Mesdheut, duke sjellë në një event të vetëm vende nga Evropa, Afrika dhe Azia. Kjo i jep lojërave një identitet unik, të reflektuar edhe në simbolikën e tyre me tre unaza që përfaqësojnë tri kontinentet e bashkuara përmes sportit. Përtej garës, këto lojëra kanë si mision afrimin e kulturave, dialogun dhe bashkëjetesën mes popujve me tradita të ndryshme.

Një tjetër specifikë e Lojërave Mesdhetare është programi i gjerë sportiv, me mbi 20 disiplina, si dhe roli i tyre si platformë zhvillimi për sportistët e rinj, të cilët shpesh i përdorin këto gara si hap drejt skenës olimpike. Organizimi nën standarde olimpike, krijimi i fshatit sportiv dhe atmosfera e bashkëjetesës mes atletëve janë elemente që e bëjnë këtë ngjarje më shumë se një garë sportive. Në këtë kontekst, Prishtina 2030 pritet të jetë jo vetëm qendër garash, por edhe simbol i bashkimit mesdhetar dhe i një kapitulli të ri për sportin kosovar. KosovaPress