Instituti i Kosovës për Drejtësi ( ka renditur disa nga vendimet urgjente që sipas tyre duhet t’i adresojë legjislatura e 10-të e Kuvendit të Kosovës. IKD-ja ka thënë  se këto vendime janë vendimtare për funksionimin normal të rendit kushtetues dhe stabilitetin e institucioneve.

Disa prej këtyre vendimeve janë buxheti dhe miratim i Planit të Rritjes.

“Një nga prioritetet kryesore të Kuvendit është miratimi i Ligjit për ndarjet buxhetore për buxhetin e Republikës së Kosovës për vitin 2026, ratifikimi i marrëveshjes me Bashkimin Evropian për Planin e Rritjes (880 milionë euro) dhe ratifikimi i marrëveshjes me Bankën Botërore (90 milionë euro). Këto vendime janë të domosdoshme për avansimin e interesave strategjike nacionale, zbatimin e obligimeve ndërkombëtare, funksionimin financiar të shtetit, zbatimin e politikave publike dhe shmangien e pasigurisë së institucioneve”, ka njoftuar IKD-ja.

Po ashtu, IKD-ja ka përmendur edhe financimin e RTK-së dhe mbështetjen e komunave.

“Po ashtu, Kuvendi duhet të sigurojë financimin e Radiotelevizionit të Kosovës (RTK) dhe mbështetjen financiare për komunat, si pjesë e obligimeve ligjore dhe politike për garantimin e shërbimeve publike dhe funksionimit të komunave në gjithë territorin e vendit”, ka thënë IKD-ja.

IKD-ja ka theksuar se vendim urgjent është edhe zbatimi i aktgjykimeve të Kushtetueses.

“Një prioritet po aq i rëndësishëm mbetet zbatimi i aktgjykimeve të Gjykatës Kushtetuese, përfshirë aktgjykimin për Ligjin për Pagat në Sektorin Publik dhe të drejtat e mbi 94 mijë zyrtarëve publikë. Moszbatimi i këtyre vendimeve cenon drejtpërdrejt parimin e sundimit të ligjit dhe besimin e qytetarëve në rendin kushtetues”, ka thënë IKD-ja.

Instituti i Kosovës për Drejtësi ka vlerësuar se legjislatura e re duhet të veprojë me urgjencë, përgjegjësi dhe transparencë , duke ç’bllokuar proceset kyçe, zbatuar aktgjykimet kushtetuese dhe forcuar rolin mbikëqyrës të Kuvendit, në funksion të garantimit të rendit demokratik dhe interesit publik.