Partia Demokratike e Kosovës (PDK) ka reaguar  ndaj qëndrimeve të Prokurorisë së Gjykatës Speciale në Hagë, e cila propozoi që ish- krerët e UÇK-së të dënohen me  nga 45 vjet burgim secili.

Sipas PDK-së, në ditën e parë të fazës përmbyllëse të gjykimit, u bë e qartë se nuk kemi më të bëjmë me një proces të zakonshëm gjyqësor, por me një përpjekje të hapur për të deformuar të vërtetën historike dhe për të ndërtuar një narrativë të rreme, ku lufta çlirimtare e popullit të Kosovës tentohet të paraqitet si projekt kriminal.

“Regjimi i Millosheviqit dhe aparati shtetëror i Serbisë kanë kryer në Kosovë dhe në rajon krime të rënda kundër njerëzimit, spastrime etnike dhe gjenocid, të dokumentuar gjerësisht nga mekanizma ndërkombëtarë të drejtësisë dhe nga faktet historike. Pra, është fakt i ditur që Serbia ishte agresore dhe populli i Kosovës ishte viktimë. Në këtë kontekst, Ushtria Çlirimtare e Kosovës ishte një organizim popullor, i lindur nga nevoja për rezistencë përballë një regjimi shtypës dhe gjenocidal. Ajo ishte përgjigje e domosdoshme ndaj dhunës së aparatit shtetëror serb dhe mohimit të çdo rruge tjetër për liri”, është thënë në reagimin e PDK-së

PDK-ja  ka theksuar se Hashim Thaçi, Kadri Veseli, Jakup Krasniqi dhe Rexhep Selimi nuk po gjykohen si individë të shkëputur nga konteksti historik, por si simbole të rezistencës, të çlirimit dhe të shtetformimit të Kosovës.

“Kjo qasje e Prokurorisë synon barazimin e viktimës me agresorin dhe kriminalizimin e luftës për liri. Ajo u konkretizua edhe sot përmes kërkesës për dënime absurde që reflektojnë vetëm ndëshkim politik dhe selektiv. Gjithashtu, përpjekja për ta ndërlidhur shpalljen e Pavarësisë së Kosovës me një pretendim kriminal është e papranueshme dhe bie ndesh me parimet themelore të së drejtës ndërkombëtare. Pavarësia e Kosovës është akt politik i njohur ndërkombëtarisht, i mbështetur nga aleatët tanë strategjikë dhe i ndërtuar mbi të drejtën universale të popujve për liri”, është thënë në reagimin e PDK-së.