Oda Ekonomike e Kosovës (OEK) ka kërkuar ndërhyrje të menjëhershme fiskale, në mënyrë që të ndalohet rritja e çmimit të derivateve të naftës.

Përmes një komunikate për medie, OEK-u ka theksuar se rritja e çmimeve të derivateve të naftës ka ndikim të drejtpërdrejtë në inflacion, duke rritur kostot e prodhimit dhe duke ulur standardin e jetesës së qytetarëve, si dhe zhvillimin e përgjithshëm ekonomik.

Për këtë arsye, Oda Ekonomike e Kosovës, ka propozuar që Qeveria të marr masa konkrete fiskale, si: ulja e tatimit mbi akcizën për derivatet e naftës dhe lirim i përkohshëm nga Tatimi mbi Vlerën e Shtuar (TVSh) për derivatet e naftës, apo së paku të ulet norma TVSh-së.

Këto masa, sipas OEK-ut do të kontribuonin në uljen e çmimeve për bizneset prodhuese dhe qytetarët, duke lehtësuar barrën financiare dhe duke stabilizuar tregun.

“Tatimi mbi vlerën e shtuar është një tatim i konsumatorit dhe i kombinuar me akcizën, i cili ka ndikim të drejtpërdrejtë në çmimin më të ulët final të karburantit. Vlen të theksohet se masa të ngjashme kanë filluar të zbatohen në disa vende të Bashkimit Evropian dhe të rajonit, me qëllim frenimin e rritjes së mëtejshme të çmimeve, e cila krijon vështirësi për bizneset dhe rrit rrezikun e varfërisë për qytetarët”, ka njoftuar OEK-u.