Më 3 maj 1998, në fshatin Ponoshec të Gjakovës, nisën përplasjet e para të armatosura që shënuan fillimin e luftës në këtë zonë. Forcat policore serbe hynë në lagjen Alijaj, aty ku ishte vendosur një pjesë e ushtarëve të UÇK-së. Sapo u vërejtën automjetet e policisë, njësitet e UÇK-së reaguan menjëherë, duke i goditur me gjithë arsenalin që kishin në dispozicion.

Në këtë përballje, Hasan Alijaj u dallua për guximin e tij, duke goditur një nga automjetet e policisë me një armë krahu “Zola”, çka rezultoi me të vrarë dhe të plagosur në radhët e forcave serbe. Pas përleshjes, luftëtarët u angazhuan për të larguar familjet nga fshati, me qëllim që të shmangnin ndonjë masakër të mundshme nga policia dhe ushtria serbe.

Me ndihmën e luftëtarëve nga Morina, Stublla dhe Smolica, të cilët hapën front duke qëlluar në drejtim të forcave serbe, u bë e mundur evakuimi i një numri të madh familjesh. Megjithatë, atë ditë u arrestuan edhe disa banorë të Ponoshecit, të cilët u zunë në befasi gjatë zhvillimeve. Nga ky fshat kanë rënë për lirinë e Kosovës 14 dëshmorë, ka shumë veteranë e invalid të luftës së UÇK-së.

Komandanti i njohur Riza Alija, “Hoxha”, një ndër ushtarët e parë të UÇK-së, ka kujtuar këtë ngjarje përmes publikimit të dy fotografive – një nga viti 1998 dhe një tjetër nga viti 2026. Në fotografinë e parë shihet automjeti i forcave serbe i shkatërruar gjatë luftimeve, ndërsa në të dytën një mjet i Forcës së Sigurisë së Kosovës pranë lapidarit të dëshmorëve të Ponoshecit.

“Me datën 3 maj 1998 ky mjet i forcave serbe u hodh në erë në lagjen Alijaj nga vëllai im, Hasan Alijaj, duke lënë të vrarë dhe të plagosur në mesin e forcave serbe”, ka shkruar ai.

Duke reflektuar mbi rrugëtimin nga ajo ditë e deri më sot, ai thekson se sakrifica e luftëtarëve dhe e popullit solli lirinë dhe shtetin e Kosovës. Nga zjarri i luftës deri te drita e lirisë, çdo hap i sotëm mbetet një kujtim dhe një nderim për ata që dhanë jetën për një të ardhme të lirë. Lavdi të gjithë dëshmorëve të kombit!