Ousmane Dembele është bërë protagonist jo vetëm në fushë, por edhe jashtë saj, menjëherë pas kualifikimit të Paris Saint-Germainit në finalen e Champions League.

Pak minuta pas fishkëllimës së fundit në ndeshjen ndaj Bayern Munichut, sulmuesi francez e tërhoqi vëmendjen në rrjetet sociale me një gjest simbolik të lidhur me një deklaratë të mëparshme të Gavit.

Mesfushori i Barcelonës, në një konferencë për shtyp para ndeshjes së Champions League kundër Borussia Dortmundit kishte reaguar ndaj kritikave për talentin e tij me fjalë të drejtpërdrejta.

“Shumë njerëz mendojnë se nuk di të luaj futboll… nuk e kanë as idenë më të vogël. Kjo është e vërteta, por është normale. Në fund është futboll dhe secili mendon çfarë të dojë.”

Pas kualifikimit të PSG-së në finale, Dembele vendosi ta ripostojë pikërisht këtë video në rrjetet e tij sociale.

Një gjest që u interpretua si një përgjigje indirekte ndaj kritikëve të tij, pas arritjes në finalen e Budapestit.

Francezi nuk u ndal me kaq: pak më vonë publikoi edhe pamje nga festimet në dhomat e zhveshjes së PSG-së, së bashku me shokët e skuadrës.

Dembele po e zhvillon një tjetër sezon të jashtëzakonshëm dhe ishte vendimtar në përballjen ndaj Bayernit, ku kontribuoi në mënyrë direkte në suksesin e ekipit gjatë dy ndeshjeve të gjysmëfinales.

Sot ai konsiderohet si një nga liderët teknikë të PSG-së dhe një nga figurat kryesore të skuadrës që synon ta mbrojë titullin e Championsit.