Drejtori ekzekutiv i Asociacionit të Komunave të Kosovës (AKK), Sazan Ibrahimi, ka takuar Mathieu Morin, sekretarin e përgjithshëm të Kongresit të Autoriteteve Lokale dhe Rajonale të Këshillit të Evropës në Strasburg, Francë.

Gjatë takimit Ibrahimi e informoi për funksionimin e Asociacionit të Komunave të Kosovës, rolin dhe aktivitetet e saj si dhe për funksionimin e Komunave në Kosovë.

Njëkohësisht, ai e falënderoi për mbështetjen e vazhdueshme që Kongresi i Autoriteteve Lokale dhe Rajonale i Këshillit të Evropës u ka ofruar AKK-së dhe Komunave të Kosovës, veçanërisht në shkëmbimin e përvojave dhe praktikave më të mira evropiane lidhur me funksionimin e pushtetit lokal dhe zbatimin e Kartës Evropiane të Vetëqeverisjes Lokale.

Në anën tjetër, Mori ka shprehur gatishmërinë për vazhdimin dhe thellimin e bashkëpunimit me Asociacionin e Komunave të Kosovës në fuqizimin dhe avancimin e qeverisjes lokale në Kosovë.

Bashkëpunimi me Kongresin mbetet i një rëndësie të veçantë për forcimin e demokracisë lokale, avancimin e vetëqeverisjes lokale dhe zhvillimin e kapaciteteve të komunave në Kosovë.