Grigory Nekhoroshev, gazetari rus që u bë i njohur pasi nxori në dritë lidhjen e fshehtë mes Vladimir Putinit dhe ish-kampiones olimpike Alina Kabaeva, ka vdekur në moshën 69-vjeçare në Letoni, vend ku jetonte në mërgim.

Raportimet bëjnë me dije se ai humbi jetën pas një helmimi të dyshuar nga kërpudhat, të cilat i kishte mbledhur pranë shtëpisë së tij në Riga.

Në vitin 2008, Nekhoroshev ishte i pari gazetar që publikoi informacionin për planet e Putinit për t’u ndarë nga bashkëshortja e tij, Lyudmila Putina, dhe për t’u martuar me Alina Kabaevën. Pas daljes së këtij shkrimi, gazeta “Moskovsky Correspondent”, ku ai punonte, u mbyll, ndërsa vetë gazetari u mor në pyetje nga shërbimet sekrete dhe u përball me kërcënime, gjë që e detyroi të largohej nga Rusia.

Miq të tij kanë treguar se Nekhoroshev kishte shfaqur shqetësime për sigurinë e vet dhe kishte frikë nga mundësia e një sulmi. Gazetari rus Igors Vatolins, i cili e kishte takuar pak përpara vdekjes, tha se Nekhoroshev ishte njeriu i parë që bëri publik identitetin e partneres së Putinit dhe se presidenti rus “nuk e fali kurrë për këtë”.

Autoritetet dyshojnë se vdekja erdhi si pasojë e konsumimit të kërpudhave helmuese. Nekhoroshev njihej si një mbledhës i rregullt kërpudhash, por këtë herë ato që kishte ngrënë rezultuan fatale.

Putini nuk e ka pranuar kurrë publikisht marrëdhënien me Alina Kabaevën. Sidoqoftë, prej vitesh mediat ndërkombëtare kanë raportuar për lidhjen e tyre dhe për fëmijët që dyshohet se i kanë së bashku.

Ngjarja që përfshin Nekhoroshevin i shtohet një sërë vdekjesh të pazakonta në Rusi dhe jashtë saj. Në vitin 2023, profesori rus Vitaly Melnikov, drejtues i Departamentit të Sistemeve të Raketave dhe Hapësirës në RSC Energia, vdiq pas një helmimi të rëndë nga kërpudhat, dy javë pasi iu shfaqën simptomat.