Ka përfunduar pjesa e parë e gjysmëfinales së Kupës së Botës mes Anglisë dhe Argjentinës, me rezultatin e bardhë 0:0.

45 minutat e para u karakterizuan nga një lojë shumë e kujdesshme nga të dyja skuadrat, me pak raste të pastra shënimi dhe shumë duele fizike në mesin e fushës. Ritmi i ndeshjes u ndërpre shpesh për shkak të faulleve, duke bërë që asnjëra palë të mos arrinte të krijonte epërsi të dukshme.

Sipas raportimit të mediave britanike, Anglia dhe Argjentina nuk regjistruan pothuajse asnjë rast të rrezikshëm në pjesën e parë, ndërsa për një pjesë të madhe të saj të dyja ekipet nuk arritën as të godisnin portën kundërshtare.

Arbitri ndëshkoi me karton të verdhë Elliot Andersonin te Anglia pas një ndërhyrjeje ndaj Lionel Messit, ndërsa më pas karton të verdhë mori edhe mbrojtësi argjentinas Lisandro Martinez.

Fituesi i kësaj përballjeje do të sigurojë një vend në finalen e Kupës së Botës, ku e pret Spanja, e cila më herët mposhti Francën me rezultat 2:0.