Zëdhënësja e Shtëpisë së Bardhë, Karoline Leavitt, ka thënë të enjten se aktualisht nuk po zhvillohen negociata mes ShBA-së dhe Iranit.

“Nuk po zhvillohen negociata tani dhe kjo do të vazhdojë derisa presidenti të ndiejë se ndoshta ata do të ulen në tryezë në mënyrë kuptimplotë. Ne ende nuk e kemi parë këtë”, i ka thënë Leavitt Fox News.

Zëdhënësja ka deklaruar se ShBA-ja është e përqendruar në ushtrimin e presionit ekonomik ndaj Iranit, një përpjekje që Shtëpia e Bardhë e ka quajtur “Operation Economic Outcast”.

Ajo ka shtuar se presidenti “vazhdon t’i mbajë të gjitha opsionet në tryezë”.

“Kemi pasur Operacionin ‘Epic Fury’ për ta shkatërruar ushtrinë e tyre. Tani kemi Operacionin ‘Economic Outcast’ për të shkatërruar ekonominë e tyre”, ka thënë Leavitt.

Javën e kaluar, Trump ka deklaruar se administrata e tij ka krijuar një kanal të drejtpërdrejtë dhe të fshehtë komunikimi me Gardën Revolucionare Islamike të Iranit, pretendim që më vonë është mohuar nga Teherani.