Presidentja e përkohshme e Venezuelës, Delcy Rodriguez, ka deklaruar se marrëveshja për naftën e arritur me Shtetet e Bashkuara të Amerikës do të mbetet në fuqi për 25 vjet dhe synon të rrisë prodhimin ditor të naftës së vendit në më shumë se 1.5 milion fuçi.

Duke folur të shtunën për transmetuesin shtetëror VTV, Rodriguez ka komentuar marrëveshjen për naftën, të cilën e ka cilësuar si “historike”. Ajo ka deklaruar se marrëveshja do të jetë në fuqi për 25 vjet dhe do të synojë rritjen e prodhimit ditor të naftës në mbi 1.5 milion fuçi.

“Qëllimi ynë është të shkojmë edhe më tej me nënshkrimin e marrëveshjeve të tjera të mëdha që përfshijnë kompani gjigante si Chevron, Repsol, Eni, Shell dhe BP. Ne duam të bëhemi një fuqi energjetike”, ka thënë Rodriguez.

“Në terma konkretë, kjo do të thotë se afërsisht 19 dollarë për çdo fuçi të prodhuar dhe të shitur do të shkojnë drejtpërdrejt në vendin tonë”, ka deklaruar ajo.

Duke folur për kontributin e pritshëm të marrëveshjes në ekonominë venezuelase, Rodriguez ka thënë se, bazuar në një çmim të naftës prej 65 dollarësh për fuçi, vendi mund të gjenerojë 209.335 miliardë dollarë të ardhura nga marrëveshja.

Rodriguez ka deklaruar se projekti përfshin zhvillimin e tetë fushave të naftës së papërpunuar në Brezin e Naftës Orinoco, i cili shtrihet në më shumë se 55 mijë kilometra katrorë në pjesën lindore dhe lindore-qendrore të Venezuelës.

Ajo ka bërë të ditur se marrëveshja parashikon një normë “royalty” prej të paktën 16 për qind dhe një normë tatimi mbi të ardhurat prej 34 për qind, duke vlerësuar se këto kushte do të përshpejtojnë rimëkëmbjen ekonomike të Venezuelës.

Rodriguez ka falënderuar presidentin amerikan Donald Trump dhe sekretarin amerikan të Shtetit, Marco Rubio, për përpjekjet drejt arritjes së marrëveshjes, duke u shprehur se “secila palë ka kontribuuar me atë që di ta bëjë më mirë”.

“Duhet të jetë absolutisht e qartë se Venezuela ruan pronësinë dhe sovranitetin mbi burimet e saj”, ka theksuar ajo.

Rodriguez ka shtuar se ShBA-ja do të sigurojë kapital, teknologji dhe kapacitete operacionale për të përshpejtuar rimëkëmbjen e sektorit strategjik të naftës në Venezuelë, i cili është prekur rëndë nga sanksionet.

Duke theksuar se qeveria do të jetë transparente me qytetarët venezuelianë, Rodriguez ka deklaruar se ata “kanë të drejtë të dinë se sa po investohet, sa po prodhohet, sa të ardhura po merr shteti dhe cilat janë kushtet për operatorët”.

Trump ka deklaruar të premten se Washingtoni ka finalizuar një marrëveshje me Venezuelën për të siguruar kontrollin e shumicës së më shumë se 65 miliardë fuçive të rezervave të provuara të naftës.

“SHBA-ja sapo ka hyrë në një marrëveshje me Venezuelën për marrëveshjen më të madhe të naftës në historinë botërore”, ka shkruar ai në platformën e tij Truth Social.

Ai ka vlerësuar sekretarin Rubio dhe sekretarin e Mbrojtjes, Pete Hegseth, për punën së bashku me Rodriguez për finalizimin e marrëveshjes.

Rodriguez mori presidencën e përkohshme në janar, pasi presidenti Nicolas Maduro u kap në një operacion ushtarak amerikan.

Trump ka pretenduar se marrëveshja është arritur përmes një partneriteti me sektorin privat dhe nuk do t’u kushtojë asgjë taksapaguesve amerikanë. Ai ka deklaruar se marrëveshja më shumë se dyfishon rezervat ekzistuese të naftës të ShBA-së dhe se, në afat të gjatë, do të “ulë ndjeshëm çmimet e karburantit” për amerikanët, duke nxitur njëkohësisht prosperitetin në vendin e Amerikës së Jugut.

Sipas Trumpit, marrëveshja do të forcojë marrëdhëniet që po zhvillohen me shpejtësi mes Washingtonit dhe Karakasit. Rubio ka deklaruar se marrëveshja është një “fitore e madhe” për të dy vendet dhe se ajo do të sjellë pothuajse 100 miliardë dollarë investime private në Venezuelë.