Ushtruesja e detyrës së presidentes, Albulena Haxhiu, ka folur për situatën në pjesën veriore të Kosovës dhe për hapjen e urës mbi lumin Ibër.

Duke folur në emisionin televiziv “Politiko” në Kanal 10, Haxhiu tha se situata në veri të vendit është tashmë krejt ndryshe nga ajo që ka qenë më herët dhe se hapja e urës për qarkullim paraqet një hap shumë të rëndësishëm.

“Në pjesën veriore të vendit tonë kemi një situatë krejt ndryshe prej asaj më herët dhe konsideroj që hapja e urës mbi Ibër është një hap shumë i rëndësishëm”, deklaroi Haxhiu.

Ajo tha se institucionet e Kosovës nuk kanë pasur përpjekje për të ndërmarrë veprime të njëanshme, duke e lidhur këtë edhe me raportet që Kosova ka me partnerët e saj ndërkombëtarë.

“Nuk kemi pasur asnjëherë përpjekje që të kemi veprime të njëanshme, për shkak edhe të raporteve që kemi me partnerët tanë ndërkombëtarë”, u shpreh ajo.

Haxhiu tha se i kanë mirëpritur deklaratat e Bashkimit Evropian dhe të KFOR-it lidhur me këtë çështje dhe shprehu pritjen që hapja e urës të realizohet sa më shpejt.

“Ne i kemi mirëpritur edhe deklaratat e BE-së, po ashtu të KFOR-it, dhe presim që kjo të ndodhë sa më parë”, tha Haxhiu.

Sipas saj, ura duhet t’u shërbejë të gjithë qytetarëve pa dallim etnie, duke garantuar lëvizjen e lirë.

“Unë mendoj që ura do t’ju shërbejë pa asnjë dallim etnive, pra pa asnjë dallim, qarkullim i lirë”, përfundoi ajo.